A Deputación da Coruña colabora co Lajareu neste ano 2025.

 Subvención da Deputación da Coruña para o ano 2025.

 

A Deputación da Coruña ven de conceder á Asociación Cultural Lajareu por Barlovento unha subvención cun importe de 3.744,00 €.

Esta subvención está dirixida á actividade deportiva de promoción da navegación tradicional en dorna mediante a organización e participación en travesías, concentracións  e regatas de dornas durante o ano 2025.

REGATA DE PRIMAVERA - 3ª PROVA

Transcribimos  de seguido a crónica da terceira proba que se celebrou onte, segundo o testemuño oral de Juan Fontaiña indo ao teste da Xaimiña.

Comeso polo percorrido, que foi saída en Coroso, boia de desmarque na praia por babor, Airoas babor, Camouco babor e para dentro meta en Coroso.

Sobre as fotos... o día non estaba para faser moitas fotos, estábache un dia sorro, que se di. Na praia de Coroso refachóns constantes… había que andar finos para non virar quilla arriba. Estivo ben!

A Josefa fíxoo moi ben. Saimos coa empopada, do porto para o Touro, que foi o vídeo que ghrabín [anexo], con moito coidado, que andaba forte a cousa, aínda sendo a empopada... De feito á altura do Touro, a nosa dorna [a Xaimiña] e alghunha mais ao entrar o refacho… puxémolas... pero a tope!!! Iamos nós, a Ardentía e a Josefa. A partir das Airoas foi onde a Josefa foi querendo marcar a singhradura, e foise impoñendo.  

Depois cara o Camouco foi algho duro, que tiñamos moito mar tamén. e vamos... que nos entraba o salseiro e a augha polo corredor a todos!!

Do Camouco para dentro aínda iamos nós  [a Xaimiña] primeiros. O Jaime despois de dar o bordo do sinal, colleu un pouco máis aberto o rumo metendo na enchama de fóra, en ves de bolinar moito e iamos andando máis ca eles [a Josefa], claro. Mais ao darmos a virada, xa vimos que estabamos máis lonxe e que nos adiantaran… Aí foi onde meteramos a soca, ahahaha…  E nada… que estivo super ben! 

Impúxose a Josefa, e hai que felisitar aos compañeiros da Arousa, o Geno e o Carterola, que estaban felises, que en 35 anos que ten esa dorna era a primeira vitoria (polo menos "ofisial"... de teren que traballala). Isto foi umha selebrasión. Estivo moi ben!

En resumo, que foi unha reghata un pouquiño exixente. Ao levarmos a vela enteira houbo que faser algho de banda. As dúas provas anteriores foram máis de paseo e esta foi un pouquiño máis seria. Mesmo a Teis dou quilla arriba. E ao haber vento de abondo cheghamos todas as dornas á xunta, non se demorou nada. Coma Vespinos fomos entrando!! ahahaha!!  Estivo moi entretido. 

E preparados para a seghinte!!

CLASIFICACIÓN:

1. Josefa
2. Xaimiña
3. Ardentía
4. Zoa
5. Papoula
6. Praia Bandorrío
7. Cortegada
8. Teis (DNF)

Álbum de fotos

REGATA DE PRIMAVERA - 2ª PROVA

 

Paso polo Camouco na segunda volta

Este sábado disfrutamos da segunda proba da Regata de Primavera cun día cuberto, con ameaza de choiva e co vento xustiño para sair a nevegar.

Sete dornas para un percorrido curto ao que lle dimos duas voltas, con vento de suroeste e 12 nos saimos proa á boia de desmarque na praia, Lajareu, Camouco, Lajareu, Camouco, momento no que rolou o vento a noroeste, o noso habitual San Alberte, e tivemos que bolinar para a chegada en Coroso.

Toda a xornada estiveron os catro de cabeza xuntiños marcándose entre eles e non se decidiu ata o último bordo onde se impuxo a Zoa de Charli e Carlos, a clasificación foia seguinte:

1.  Zoa
2. Josefa
3. Xaimiña
4. Carmen
5. Teis
6. Moura
7. Cortegada

Aquí vos deixamos algunhas fotos da xornada.

Álbum de fotos da xornada

REGATA DE INVERNO 2017 DE DORNAS A VELA

INICIO DA TEMPORADA DE REGATAS EN RIBEIRA

Na última fin de semana de xaneiro o Lajareu celebrou a asemblea xeral ordinaria anual e programamos as actividades para este ano.

Empezamos como é habitual coa Regata de Inverno con catro probas durante os meses de febreiro, marzo e abril, concretamente as datas son o 25 de febreiro, 11 e 25 de marzo e o 8 de abril. 

Logo da Semana Santa faremos a Regata de Primavera os días 29 de abril, 13 e 27 de maio e o 10 de xuño. Nese mesmo mes xa teremos outras regatas na ría e tamén o Encontro. 

O 22 de xullo, nas festas de Ribeira, a Regata do Carme e a primeira fin de semana de setembro, o día 2 unha travesía e xuntanza similar a que fixemos este ano.

Aquí vos deixo o Anuncio de regata que facemos habitualmente. Un saúdo e bo vento.

REGATA DE INVERNO 2015 DE DORNAS A VELA

En Ribeira comeza a temporada de regatas.

No Lajareu programamos a habitual Regata de Inverno con catro probas durante os meses de febreiro, marzo e abril, concretamente as datas son o 21 de febreiro, 7 e 21 de marzo e o 11 de abril.
Durante estes meses tamén coincide que se farán as eleccións á xunta directiva, por se tiñamos poucas este ano, pero xa vos iremos dando novas deste tema.

Aquí vos deixo o Anuncio de regata que facemos habitualmente. Bo vento.

.

A REGATA DE PRIMAVERA 2014 CUMPRIU AS ESPECTATIVAS DE PARTICIPACIÓN E COMPETICIÓN

A ÁNCORA GAÑOU ESTA EDICIÓN 2014 DA REGATA DE PRIMAVERA

Cada vez son mais as dornas que participan nesta regata que se fai anualmente cunha combatividade cada vez maior e sempre aparece xente nova que se interesa pola navegación tradicional. Logo do aprazamento da última proba que estaba prevista para o día 7 e se disputou o día 21, aquí vos deixamos as fotos e a clasificación da regata de primavera deste ano.

.

.

A clasificación final:

SE SUSPENDE TEMPORALMENTE A DERRADEIRA PROBA DA REGATA DE PRIMAVERA E SE TRASLADA AO SÁBADO 21

As condicións climatolóxicas non permiten disputar a regata que estaba prevista.

O tempo de hoxe coincide coa predición que daban estes días pasados, hai ventos de forza cinco do sur con refachos de forza sete. Este é o motivo polo que se suspende a regata que tiñamos prevista para hoxe no Lajareu de Ribeira e tamén vemos que se suspendeu a regata dos Amigos da Dorna de Portonovo.

As regatas de primavera que fai todos os anos o Lajareu a estas alturas xa están rematadas pero este ano non coincidiu ben e andamos metidos en xuño, combinando para non pisar as regatas doutros clubs aínda que non sempre se consegue.

A semana que ven, o sábado 14 é a Regata dos Faros do Grove á que nos gusta ir e na que teremos representación, por iso pospoñemos para o día 21 a cuarta proba da regata de primavera. Aquí vos deixamos a clasificación provisional.

A SANDRA VENCE A PRIMEIRA PROBA DE PRIMAVERA NUNHA CHEGADA MOI AXUSTADA

A chegada desta primeira proba resultou apretadisima pero a Sandra sóubolle sacar dúas esloras á Xaimiña e algo máis a Áncora.

A Sandra con José Antonio e Panarro a punto de atravesar a chegada.

No Lajareu iniciamos o pasado 3 de maio as regatas de Trofeo de primavera e resultou unha tarde tranquila con pouco vento e sen mar. Foi moi agradable a saída en dorna polas augas de Ribeira.

Aquí tedes todas as fotos no álbum da regata.

Saímos 11 dornas e fixemos un percorrido non moi largo por se caía o vento; saída proa á baliza de desmarque na praia de Coroso, ás Airoas por babor, volta ao Lajareu para deixalo por estribor, Camouco por babor e unha bolina ata a liña de chegada na mesma baliza na praia de Coroso.

A clasificación desta proba foi:

Sandra, 

Xaimiña, 

Áncora, 

Ardentía, 

Volandeira, 

Vikinga, 

Rabuda II, 

Papoula, 

Praia das Carolinas, 

Moura, 

Praia de Bandaurrío

.

.

FINALIZOU O CAMPIONATO DE INVERNO DE DORNAS A VELA 2014 E INICIA A REGATA DE PRIMAVERA 2014

BOA TARDE DE SOL CUN VENTO DE ENTRE 12 E 15 NÓS NA 4ª E ÚLTIMA PROBA DA REGATA DE INVERNO.

Este sábado 26 de abril doce dornas tomaron a saída dende Ribeira para completar a última das catro mangas das que constaba este campionato. O vento, moi estable e ben definido do oeste, andaría entre os 12 e os 16 nós, con algún refacho de algo máis de intensidade.

Aquí tedes o álbum de fotos da regata.
Unha tarde axeitada para levar toda a vela, aínda que algúns participantes atrasarían o centro vélico, deixando caer o mastro para andar algo máis seguros. Non foi isto unha imposición da comisión de regata, pero  si algo importante para conseguir un mellor equilibrio na dorna.
.

A saída  co vento na proa, fíxose dende preto da Illa do Ratos para ir proa a boia de desmarque, moi preto da entrada do club náutico. Neste primeiro tramo, sería  a Áncora,  Xaimiña, Sandra, Volandeira, Ardentía e Vikinga  as que foron deixando a boia de  desmarque, por babor, formando un primeiro grupo bastante apretado. Dende aquí e co vento polo través, habería que deixar  o faro do  Lajareu,  tamén por babor, no que non habería cambios significativos no orden de paso,  soamente resaltar un pequeno golpe xusto ao virar a boia de desmarque  entre a Volandeira e a Sandra que non tería máis  consecuencias.

Xa no terceiro  tramo, ata  a Illa de Rúa, e co vento pola aleta de estribor, destacaría a Sandra facendo unha moi boa remontada e rebasando ao segundo posto que nese intre era da Áncora. A Xaimiña foi a primeira dorna en rebasar a Illa. A esta altura, destacar o percance que sufriu a Sandra partindo o mastro pola parte superior, xusto no momento de facer a virada por popa, e aínda que perdeu moito tempo reparando a desfeita, chegaría polos seus propios medios, máis  xa perdera toda opción a loitar por unha praza no podio.

Ata o seguinte paso, o sinal do Camouco, e co vento de proa, abriríase moito o campo da regata, onde algúns decidiron ir cara terra e outros cara fora, máis a clasificación non sufriría cambios significativos, virando este paso a Xaimiña, a Áncora e a Vikinga nos primeiros postos.

Na chegada a meta sería a Áncora a que alcanzaría a Xaimiña, entrando esta na segunda posición, e Vikinga e a Ardentía no terceiro e cuarto posto a moi pouca distancia das primeiras.

O resto do grupo entrou así: Volandeira, Moura, Rabuda II, Cachi, Sandra, Praia das Carolinas, Xarda e Beliña.

Logo de publicar a clasificación houbo unha reclamación dunha dorna por considerar que a puntuación final era incorrecta. O comité de regatas logo de estudar as motivacións e comprobar os resultados acordou estimar a reclamación, polo que a clasificación final do campionato de inverno foi a seguinte:

E unha tras doutra, iniciamos xa a Regata de primavera 2014 aproveitando os sábados con marea alta na tardiña. 

 

 

BO VENTIÑO NA TERCEIRA DE INVERNO

O passado sábado dia 29 de março realizámos a terceira prova da regata de Inverno. Após umha semana de previssons pesimistas que ameaçavam com o mesmo panorama que na segunda prova, finalmente gozámos dum vento magnífico superior aos 10 nós. À saída em Coroso seguia um desmarque entre a entrada do porto e o sinal do Lajareu. Entre as duas opçons possíveis, a de sair cara Rua e nom cara Ribeira resultou a mais favorável por ser o vento mais constante em intensidade e direcçom. A partir deste desmarque já se forom configurando as diferenças entre as embarcaçons. Na longa empopada até a primeira batea de Palmeira formou-se um grupo de cabeça: Sandra, Vikinga, Áncora, Volandeira e Rabuda aumentarom a vantagem com o resto das dornas. Passada a betea vinha umha outra escolha para chegar ao Camouco. As dornas que continuárom cara o suroeste navegavam contra o mar que entrava na ria de este rumbo, as que virárom e pugérom proa à ilha dos ratos tomárom vantagem. Após virar cara o Camouco, Sandra e Vikinga passárom primeiras, muito a barlovento deste sinal. A Áncora apurou ao máximo e assim recuperou o terceiro posto que cedera à Rabuda por tomar rumbo suroeste. A Rabuda asegurou em excesso a virada para passar o Camouco, e a Volandeira sufriu o desprendemento da pletina para o gancho da driça, que a deixou num quinto posto. A última baliça, o passo do Lajareu, nom produziu mudanças no grupo de cabeça. A ordem de chegada e a detalhada abaixo.

Sandra, Vikinga, Áncora, Rabuda, Volandeira, Cachi, Praia das Carolinas, Moura, Xaimiña, Xarda, Beliña.

O vindeiro 12 de abril teremos a última prova da regata de Inverno, com a entrega de trofeos, e presentes para todas as tripulaçons.

19 de xullo e 6 de setembro en Ribeira

Boas a todos, xa temos as datas para as nosas actividades de verán. Habitualmente viñamos facendo dúas regatas no verán pero este ano temos algúns cambios.

O Trofeo Dorna de Prata na tradicional Regata do Carme que sairá como sempre das inmediacións da praia de Coroso será o 19 de xullo.

Con respecto á nosa segunda cita habitual de primeiros de setembro este ano temos novidades: non imos facer regata. No seu lugar celebraremos unha Xuntanza en Palmeira, excluíndo o elemento competitivo, para lembrar e homenaxear ao noso amigo que tanto nos aprendeu, José Bermo, "o Americano", que como sabedes era de Palmeira e que nos deixou hai un ano. Reservamos o 6 de setembro para velear ata alí.

José Bermo, navegando na Papoula con Carlos, na regata de primavera de 2010.

Aínda non temos definido o programa nin o horario concreto desta Xuntanza, que iremos precisando segundo se achegue a data, pero queremos recordar a José facendo o que fixemos con el tantas veces: navegar nas nosas dornas e falando e confraternizando despois diante dunhas cervexas e uns petiscos.
Estades todos convidados.

Carlos e o Americano levaron premio naquela regata de primavera 2010

Pouco vento na primeira e segunda proba deste inverno

A próxima regata esperanos o sábado 29

Encalmada na abra de Ribeira durante a regata de dornas

O passado sábado dia 8 de Março começámos as provas da regata de Inverno do Lajareu. Às quatro da tarde, a hora marcada para a saída, semelhava que após umha manhá sem vento, teriamos algo para fazer a regata. Deu-se a saída na praia de Coroso, proa à praia para tomar a boia de desmarque frente ao límite da praia cara a Ribeira. A Moura tomou a saída de primeira e também alcançou o desmarque em primeira possiçom, mas a partir deste momento o vento caeu ao mínimo e começou umha interminável empopada cara ao ilhéu de Rua que demorou duas horas. Quase todas as dornas levavam a vela por babor, excepto a Volandeira e a Cachi, que tomarom um rumbo mais cara ao leste que as demais com a vela por estribor para aproveitar deste curiosa maneira o vento de noroeste. Mas a escolha resultou acertada e acabárom por alcançar Rua antes que o resto da flota, seguidas pola Xaimiña e a Sandra, Vikinga, Moura e Áncora, Praia das Carolinas e Papoula , e a Beliña. A continuaçom refrescou um pouco o vento e a maioria das dornas virárom cara a Palmeira para aproveitar o vento de terra e reduzir o número de bordos. E esta foi também a melhor escolha, as dornas que buscárom vento mais cara ao oeste perdêrom postos na prova.

E por último dar as boas vindas à tripulaçom da Beliña, Alicia e Xoan, que se incorpora as regatas do Lajareu com esta prova.

A ordem de chegada foi como a continuaçom se relata:

1  Volandeira
2  Cachi
3  Xaimiña
4  Sandra
5  Áncora
6  Vikinga
7  Moura
8  Praia das Carolinas
9  Papoula
10 Beliña

Todas as fotos están colgadas neste álbum.
.

.
A segunda proba foi o sábado 15 e resultou peor que a primeira porque ningunha das dornas foi quen de finalizar. O vento prometía do nordés pero non chegou a entablar e quedamos todas as dornas no Camouco, así que a clasificación segue coma na anterior regata, engadindo a Xarda, con Carlos e Carmen, que xa se uniron á frota.

O noso agradecemento a Sabela polas fotos. Vémonos para a vindeira.

Iniciamos a temporada de regatas de dornas en Ribeira.

Regata de inverno 2014.

Xa era tempo de empezar a mover as dornas e nada mellor que botalas á auga e facer algunha regata. 

O Lajareu  programou a habitual Regata de Inverno con catro probas durante os meses de marzo e abril, concretamente as datas son o 1 de marzo, o 15, o 29 e o 12 de abril. Dependemos sempre das condicións meteorolóxicas así que esperemos que se poidan manter neses días.

Nestas datas adoitan ser regatas cortas porque cae pronto o sol, papamos algún chuvasco e anda o frío ao redor pero esa é a gracia que ten; xuntarnos as tardiñas dos sábados, falar da brea e do saín, e que uns coseron un rizo e outros non.

Aquí vos deixo o Anuncio de regata que facemos habitualmente. Bo vento.

A REGATA STA. UXÍA TRASLADASE AO DÍA 21 AS CATRO DA TARDE

O Lajareu tiña prevista para o pasado día 7 a regata que habitualmente facemos a primeiros de setembro. Ese día levantouse con vento do norte de mais de 20 nós na abra de Ribeira e as predicións indicaban que se ía manter toda a xornada, igual que nos días anteriores.

Por este motivo e tendo como exemplo todas as incidencias que houbo na regata do Carme, xa pola mañá decidiuse non facela. Logo o tempo tivo altibaixos e non foi o que estaba previsto, recalmou ao mediodía e voltou a subir ata os 28 nós de máxima. 


A decisión do comité de regata de suspendela sempre trae comentarios pola tardiña pero hai que respetala porque teñen que pensar en todas as dornas e non só nas cinco primeiras.

As dornas deixan o Lajareu por babor na regata de Sta. Uxía 2012 para poñer proa ao Camouco, ao fondo

Cunha foto desta regata no ano pasado invitámosvos a vir o próximo sábado día 21 para disputar a edición do 2013.

A REGATA DO CARME, TROFEO DORNA DE PRATA SERÁ O 17 DE AGOSTO

Ola a todos, logo de idas e voltas coa data, o sábado 17 de agosto organizamos a nosa regata principal do verán, a Regata do Carme, Trofeo dorna de prata. A saída está prevista para as 16:00, momento a partir do cal se dará a primeira pitada.

Dende o Lajareu invitamos a todos os clubs a que veñan a pasar o día a Ribeira e a participar nesta regata, na que coma todos os anos, ademais da clasificación individual, ponse en xogo a Dorna de Prata na clasificación por clubs.

Esta é unha regata por equipos na que se pon en xogo o trofeo "Dorna de Prata" que o equipo vencedor deposita na sede do seu Concello durante un ano, ata que se dispute de novo. 

Por cada club puntúan as tres primeiras dornas de cada un e o que teña menor puntuación é o vencedor. O ano pasado a Zoa de Charli e Xosé gañaron a regata e axudaron a que a "Dorna de Prata" quedase en Ribeira. Sempre está complicado facer que as tres dornas que puntúan estean preto da cabeza porque a competitividade é moi alta e cada ano os regatistas afinan mais, calquera despiste ou fallo faite baixar na clasificación.

Outra cita próxima é este sábado 10 na Illa de Arousa, onde se disputa a Regata do Bao 2013, que se caracteriza porque a saída é dende a praia, coas dornas varadas.

Como xa comentou Xosé nalgunha entrada, o importante é navegar, desfrutar con todos do mar e que haxa dornas a bolinar na ría.

Como facemos ultimamente, publicamos o Anuncio de Regata co que intentamos informar das condicións de participación e espallar o máximo posible o evento. 

Iniciamos a XVII Regata de primavera de dornas a vela no Lajareu

A LUSIÑA GAÑA A 1ª PROBA DESTA REGATA DE PRIMAVERA 2013 LOGO DUNS BORDOS DE BOLINA MOI BOS NOS QUE PASOU ÁS DORNAS DE CABEZA



A Lusiña pasa por barlovento da Carabeliña

O pasado sábado 20 de abril disputamos a 1ª proba da regata de primavera 2013, na que participaron as dornas do Lajareu A Fiuza, Cachi, Lusiña, Papoula, Praia de Bandourrío, Rabuda II, Sandra, Volandeira, Xaimiña e Xarda.

A tarde presentábase moi fermosa, co ceo azul e limpo, con vento moi frouxo do oeste pero con previsións de que forse a máis segundo pasase a tarde. O percorrido da regata foi saída de Coroso cara ao faro de Lajareu por babor (través), para despois seguir cara ao sinal do Caamouco por babor, a Illa de Rúa por babor (empopada) e chegada en Coroso (bolina).

A praia de Coroso foi testemuña da axustada saída sobre a pitada das primeiras dornas

A saída foi sobre as 16:30, cun vento fresco do noroeste cara ao Lajareu, que fixo andar lixeiras as dornas. Volandeira alcanzou o Lajareu no primeiro posto, mais seguida de preto pola Lusiña, Sandra, Xaimiña e o resto da flota e no que houbo que facer unha trasluchada para coller rumbo ao Caamouco e Rúa . A Xaimiña, que fixo unha manobra perfecta, saíu 1ª nada máis pasar o faro e as dornas foron empopadas ata Rúa. Neste treito, a Xaimiña, Lusiña e Volandeira loitaron por coller o barlovento mentras Sandra se afastaba desa loita. Volanderia pasaría 1ª o Falante de Rúa, pero coas outras tres pegadas á súa popa.

A saída de Rúa fíxose por esta orde: Volandeira, Sandra, Xaimiña e Lusiña. Aquí compre salientar a grande manobra da Lusiña, que navegou arrimada a Rúa e sorteando as pedras foi quen de saír pola Carabeliña. Isto fíxolle gañar un barlovento que na bolina a Coroso tería un valor de grande interese.

As dez dornas que participaron nesta proba logo de pasar Rúa. Hai que fixarse na terceira de babor para ver que son dúas

Unha tarde estupenda na Arousa. As dornas bolinan dende Rúa proa ás Airoas con Aguiño ao fondo

Ao saíren de Rúa toda a frota foi cara ás Airoas, xa con vento máis fresco do NO, e como acontece neste tipo de rumbos algunhas decidiron coller o rumbo de terra (Rabuda, Xaimiña .......) e as demais achegarse ás Airoas. Volandeira gaña o barlovento á Sandra pero non pode con Lusiña que favorecida por este vento máis forte navegaba moi veloz e rompendo moi ben as ondas.

Sandra e Volandeira viran para Coroso mentras Lusiña aproveita para achegarse ás Airoas todo o posible.

Indo xa para Coroso, Volandeira tenta rectificar facendo outro bordo, pero as súas bolinas non evitaron que Lusiña, imparable, cruzase a meta con tranquilidade. Sandra aproveitou moi ben o seu bordo e conseguíu pasar por diante da proa da Volandeira a poucos metros da meta. Xaimiña tivo que loitar e seu 4º posto coa Papoula tamén a pouco da liña de chegada.

Estas son todas as fotos. José María as fixo ben de preto, incluso dende o Caamouco.

A clasificación desta proba foi a seguinte:

1º Lusiña (Antonio e Ron)

2º Sandra (Jose Antonio e Marcos)

3º Volandeira (Víctor e José)

4º Xaimiña (Xaime e Xaime)

5º Papoula (Carlos e Manolo)

6º Rabuda II (Xose e Santi)

7º A Fiuza(Severino e Nacho)

8º Cachi (Juan e Jesús)

9º Praia de Bandourrio (Fran e Emilio)

10º Xarda (Carlos e Carmen)

A segunda proba é este sábado 4 así que vos esperamos coma sempre sobre as 16:00 para velear de novo.

Hai que facer unha mención especial aos novos regatistas do Lajareu que xa completan unha regata e cada día o fan mellor, todos pasamos polo último posto da clasificación e dende aí unicamente se pode ir para arriba. (Pode que algo de culpa a tivese o teléfono, que despista e perdes o rumbo)

Carmen e Carlos na Xarda

Rematou o 17º campionato de inverno de dornas a vela en Ribeira

REGATA MARCADA POR UN TEMPO BASTANTE ESTABLE CON VENTOS QUE RONDARON OS 12 NÓS CARGANDO NAS RACHAS ATA OS 16 NÓS.

O pasado sábado día 6 de abril disputouse a última proba da regata de inverno de dornas a vela do ano 2013, na que participaron as dornas A Fiuza, Lusiña, Moura, Papoula, Praia de Bandaurrío, Rabuda II, Sandra, Vikinga, Volandeira, Xarda e Xaimiña.

A tarde presentábase co ceo entre nubes e claros e con unha temperatura bastante aceptable que rondaba os 14º. O vento moderado e moi fixado do noroeste, que andaba nos 10 nós chegando ata os 17 nas rachas.

Con estas condicións os participantes disfrutarían, por primeira vez neste campionato de inverno, dunha tarde con moi bos momentos de sol e nada de choiva. Todo un luxo.

O percorrido da regata foi: Saída dende o medio da abra de Coroso proa á boia de desmarque, que estaba preto do náutico, para deixala por babor e continuar ás Airoas nun través. Dende aquí seguirían ata as Lobeiras levando neste tramo o vento pola aleta, para continuar cara a meta nunha ceñida moi pechada.

Na saída do percorrido ata a boia de desmarque as dornas chegarían bastante agrupadas, destacando a Sandra, Xaimiña, Volandeira e Moura.

Ata o seguinte paso, as Airoas, non habería cambios no orden de chegada. A esta altura a embarcación peor parada sería a Rabuda II que volcou no momento da trasluchada, aínda que sen máis consecuencias xa que as lanchas de salvamento marítimo e protección civil foron rápidas en axudar aos tripulantes.

No seguinte tramo ata as Lobeiras tampouco habería cambios significativos na clasificación, pero dende aquí ata a meta si que o orden de chegada daría un cambio importante xa que algunhas das embarcacións situadas nos primeiros postos decidirían facer o bordo cara fora e perderían moita vantaxe con respecto as dornas que decidiron facer o bordo cara Palmeira.

Algunhas dornas como a Xaimiña, Sandra ou a Papoula serían as máis prexudicadas, e a Vikinga e a Lusiña as máis beneficiadas.

A Volandeira sería a única en manter o seu posto, entre os de cabeza, despois de facer o bordo cara fora, e moi meritoriamente facer un segundo posto na clasificación final. Neste caso a veteranía de Xosé e Carlos xogaría ao seu favor.

A clasificación final foi a seguinte:

1º Lusiña

2º Volandeira

3º  Vikinga

Seguidos da Sandra, Papoula, Moura, Praia de Bandaurrío, Xaimiña e A Fiuza e non remataron a regata a Xarda nin a Rabuda II.

Con isto rematou a regata de inverno da que podedes ver aquí a clasificación final.

Hai que darlle os parabéns a Fernando e Carla polo seu primeiro posto coa Vikinga,

Suso, da Moura, entregando o trofeo aos vencedores da regata, Carla e Fernando da Vikinga

a Antonio e Ron da Lusiña polo segundo 

 

A Lusiña, vencedores desta proba e segundos na clasificación xeral. Antonio co seu fillo que xa está pedindo unha dorna e o seu teste Ron. Parabéns.

a José Antonio e o seu fillo Miguel na Sandra polo terceiro. 

José Antonio e Miguel, pai e fillo, na Sandra, sempre nos primeiros postos

Claro está ao resto da flota tamén entre os que me atopo. Podedes ver neste álbum todas as fotos desta última proba.

Damos as gracias aos compañeiros que nos axudan a facer estas cousas nas embarcacións de apoio, á xente de protección civil e claro está a José María o noso habitual xuíz de regata que tamén fai de reporteiro fotográfico. 

Como sempre que rematamos una regata fixemos unha xuntanza á que se achegaron amigos e familiares así que pasamos unha tardiña boa entre as dornas do Lajareu.