REGATA DE PRIMAVERA - 3ª PROVA

Este sábado, segundo o calendário estabelecido celebrou-se a 3ª prova da regata de primavera. O vento foi SW duns 10 nós cos seus refachinhos. Foi um dia mui bom para a dorna e que deu numha regata emocionante que relatamos de seguido. 

Os passos forom umha boia de desmarque em Coroso, o sinal do Lajareu, Camouco por estribor, e de bolina de novo cara as Airoas para rematar coa entrada de novo na praia de Coroso.  

Recolhemos a crónica que nos passa Álvaro desde a privilegiada popa da Jalerna que levou a dianteira nesta prova:

Despois do bocinazo dos 10 minutos a frota comezou coas manobras de aproximación. No momento da saída podía verse como a Zoa, moi ben posicionada e amurada a estribor seguida pola Fiúza e a Xaimiña, facían o bordo para a boia de desmarque. 

Neste primeiro tramo da regata, a Jalerna, amurada a babor, buscáballe a popa para evitar colisión. A Caranceira, que viña dun grande segundo posto na prova anterior, encontrábanse no grupo dos 5 primeiros, pero aínda quedaba moita regata.  

No pase da boia de desmarque, tras unha bolina con dúas viradas, tocaba largar vela e subir rumbo ao Lajareu.

Dende o Lajareu para o Camouco, coa vara de portar, empopada con constantes ataques entre os primeiros da frota, Zoa e Moura non daban por perdida a vitoria, pero o pelotón achegábase a acortaba distancia. 

Unha vez pasado o Camouco tocaba de novo bolinar para deixar por babor os Airós. Aquí houbo dúas tácticas, a cabeza da frota optou por fóra, e outro grupo por dentro, mais pegados á terra. O grupo de terra, liderado pola Xaimiña fixo unha remontaba espectacular onde pasou a poucas esloras da Jalerna e colábase incluso por diante da Zoa na virada. 

Xa rumbo á meta, con constantes roles de vento, a frota traballou duramente axustando escotas sen descanso, para entraren na clasificación que segue: 

Classificação da prova

(Acta do juiz no álbum de fotos cos tempos de entrada) 

1. Jalerna
2. Zoa
3. A Fiuza
4. Xaimiña
5. A Lixeiriña
6. Tixosa
7. Teis
8. Sandra
9. Moura
10. Caranceira 

Os parabéns a Álvaro ("transvasado" da sua Abuelo Tucho) e Carterola, polo domínio da prova em todo momento coa Jalerna vinda da Arousa. 

Como não também os parabéns a Charly e Carlos na Zoa que sobem nesta prova ao segundo posto, e A Fiúza, com Severino e Nacho também do Lajareu de Ribeira, que se mantém nesta prova com força nesse posto de podium entrando de terceira. 

Desfrutamos vendo de novo nesta xeira de regatas à Tixosa, umha clásica do Lajareu a navegar com Tucho e Juan que vêm de pó-la ao dia. 

Ânimo à Caranceira, com todo o esforço de virem desde Portonovo, Mariña e Tino, filha e pai, que fixerom um papel mui destacado na prova anterior que aguardamos remontem nas seguintes provas. E o reconhecimento à Lixeiriña também que vem de Cambados. 

O agradecimento como sempre a todas as dornas participantes, juiz, embarcações de apoio e fotos e vídeos que as fixo mui chulas desta volta o Marcos.

Classificação geral provisional

ÁLBUM DE FOTOS E VÍDEOS

Álbum de fotos e vídeos da prova (Fotos de Marcos Buide)

SEGUINTE PROVA

Lembrai que o sábado dia 20 de maio temos a seguinte prova da regata de primavera:

Calendário de regatas

Anúncio de Regata de Primavera e inscrição . Podem inscrever-se novas dornas em qualquer momento (Umha inscrição vale para todas as provas).

REGATA DE PRIMAVERA - 2ª PROVA

Encetou por fim a xeira de regatas de dorna a vela do Lajareu. Foi este sábado 29 de abril numha jornada com mui boas condições para iniciar a tempada de vela.

O vento foi de airexa constante do SW duns 6 nós, mar calmo e boa temperatura. Estava todo enquadrado num ceio potente de contrastes entre azuis puros, nuvens brancas e luminosas e algum castelo que ameaçava trebom sem chegar a nada e atravessado todo polas raiolas de sol que alumeavam o campo de regatas. Em duas palavras: espectacular ria!

O percorrido acordado polo comité de regatas foi a linha de saída entre a praia de Coroso e o Náutico, sendo o primeiro passo os ilhotes das Airoas por babor. Este foi o tramo de desmarque no que houvo que remontar o vento em três ou quatro bordos até a ponta da Ameixida. Rodeadas as Airoas, o seguinte passo foi o baixo do Camouco por babor, para finalmente ter que passar o sinal do Lajareu deixando-o por estribor e linha de entrada de novo no Náutico.

Com 12 dornas inscritas, completam esta manga as dez dornas classificadas que seguem:

1. A Fiuza 
2. Caranceira
3. Papoula
4. Teis
5. Lixeiriña
6. Sandra
7. Zoa
8. Tixosa
9. Cortegada
10. Moura

Parabéns à Fiuza com Severino e Nacho do Lajareu de Ribeira que abrem a tempada co primeiro posto.  

Um reconhecimento mui especial à Caranceira por estrearem-se na abra de Ribeira com esse segundo posto acadado por Mariña e Tino, vindos desde Portonovo. A Caranceira, com Mariña de patroa, fixo umha mui boa regata mantendo-se em primeiro posto até o último passo no Lajareu no que semelha que perderom a dianteira por desconhecer a marca. Sentimo-lo, mas reiteramos os parabéns polo domínio demonstrado.

E no terceiro posto também aperta mui grande para a Papoula com Carlos e Jorge, que semelha começam fortes este ano. 

Em cualquer caso o agradecimento a todas as dornas participantes, que é o importante, e em especial às dornas e persoas que vinherom competir desde outros portos. Também reconhecimento para o juiz e embarcações de apoio que estiverom sempre atentas a qualquer necessidade. Cumpre destacar a dorna Cortegada, recuperada com muito trabalho por Jesús e que vemos agora fachendosa a navegar numha regata. 

Álbum de fotos da Regata (Juan Luís e Álvaro)

SEGUINTE PROVA

Lembrai que este sábado dia 6 de maio temos a seguinte prova da regata de primavera:

Calendário de regatas

Anúncio de Regata de Primavera e inscrição  (Umha inscrição vale para todas as provas)