REGATA DE PRIMAVERA 2026. 2ª PROBA

Bo día navegantes, 

O pasado sábado 18 de abril realizouse a 2ª regata da temporada do Lajareu con 9 dornas a competir.

O día foi solleiro con vento variable, calma e un airiño final de noroeste sobre ás 18:30 de 5 nós que impediu que se completase o percorrido marcado ao inicio.

As dornas saíron preto da praia de Coroso, rumbo á boia de desmarque no sureste que había que deixar por estribor. Non fixeron falta bordos de bolina polo role de vento para o sur que permitiu un único bordo para deixala libre. Unha única virada e estaban todas as dornas co Lajareu na proa que había que deixalo por babor para finalmente voltar á abra de Coroso e rematar onde fora a saída.

Conforme avanzaba a regata e moi preto do faro Lajareu o vento desvaneceuse deixando calma chicha e o xuíz decidiu adiantar a finalización e ordenar a clasificación conforme á proximidade do faro Lajareu.

As dornas baixaron a vela de relinga e voltaron a terra a remo a maior parte delas, algunha remolcada e unha delas aproveitou un airiño para unha ultima bolina antes de chegar a porto.

Aquí queda o álbum de fotos desta regata e as clasificacións

Clasificación desta proba 

Clasificación provisional logo de dúas probas

HAVIA ÂNSIAS DE DORNA!

Disputada hoje a primeira prova da Regata de Primavera de dornas a vela do Lajareu. E bem se viu que havia ânsias de dorna... Dez tripulações coas dorninhas arranchadas e no mar coma cravos à hora convocada para a saída (cousa pouco frequente!!).

O dia prestava. Solheiro, ventinho NW de 8 a 12 nós,  macanudo para velejar, e o mar pedindo-o. Fixo-se boia de desmarque em Coroso e o triângulo Airoas por babor, Camouco por babor e entrada de novo na boia de saída. 

Virom-se caras novas, relevo geracional e algumha moça, para além de patróns com mestria e anos no clube dos que gosta saudar e reencontrar. E como não...dornas de Ribeira e dornas da Arousa sem as que estas regatas teriam pouco sentido.

A Loba de estreia, e de baptismo... virada quilha ao sol na primeira pitada a 10 min da saída. Ainda assi, arranchamos em por nós, e de sextos entramos. A Loba vai dar muito que falar!!! ;-)

E assí foi na linha de meta:

1. Xaimiña
2. Zoa
3. Ardentía
4. Carmen
5. Rosalía
6. A Loba
7. Cortegada
8. Praia do Bandurrío
9. Tixosa
10. Teis 

Parabéns a Jaime e a Juan polo primeiro posto da Xaimiña, e sobretodo a todas as dornas participantes, comité de regatas, xuiz e persoal de apoio em mar e terra.

Vemo-nos o 18 de abril para a segunda prova (se não antes no mar!)

ANUNCIO DE REGATA DE DORNAS - PRIMAVERA 2026 LAJAREU

Este sábado 21 de marzo iniciamos a temporada de regatas no Lajareu coa disputa da primeira proba da Regata de Primavera 2026 de dornas a vela, ás 16:30.

Como sempre, quedamos con antelación na nave do Lajareu en Ribeira para baixar as dornas pola rampla que temos ao carón.

Animamos a todas as tripulacións e clubes de dornas a se achegar por Ribeira para participar nestas regatas e pasar unhas boas xornadas de mar e de vela tradicional.

Vai de seguido a ligazón para a inscrición e o anuncio oficial de regata.

FORMULARIO INSCRICIÓN DA REGATA DE PRIMAVERA 2026

E podes descargar aquí o Anuncio de Regata Lajareu Primavera 2026.

Severino Somoza e Nacho Jorganes na Fiuza co Lajareu ao fondo

Regata de Primavera 2024

Anuncio de Regata de Primavera 2026

CALENDÁRIO DE REGATAS 2026

Aprovado na assembleia geral ordinária do Lajareu, o calendário de regatas  para dorna a vela, organizadas desde o clube de Ribeira para este ano:

 Regata de Primavera , com 5 provas
- 21 março
- 18 abril
- 02 maio
- 16 maio
- 30 maio

Regata do Carme, 25 de julho  (coordenado coa Dorna da Arousa para não quadrar co Carme, e facilitar a participação).

Como sabedes, cada prova da regata é aberta para todas as dornas que queiram participar de qualquer clube ou particulares. Haverá entrega de troféus o último dia da regata segundo a classificação por pontos de todas as provas nas que se participara. Rege o regulamento oficial da categoria "dorna" e o regulamento internacional de vela da ISAF.

As saídas (primeira pitada) darão-se às 16:30, prévia inscrição telemática obrigatória (publicará-se), ou passar antes polo galpom do Lajareu.

Ficam programadas também a tradicional regata do Carme.

Contamos convosco!!

PALMEIRA FOREVER!

A visita ao enxebre porto nunca defrauda. A navegação foi ótima, um ventinho de SW, boa temperatura, céu azul com algumha nuvinha e os arroaces -sempre amigos das dornas- a guiar-nos. 

O mar andava tranquilo e assequível, quitado a vaga de ondas que nos meteu a super-patrulheira da Benemérita que véu vigiar se nos estavamos a portar bem (vai haver que lhes dar um curso de embarcações tradicionais, ou que venham cumha eslora um pouco mais atinada ao caso). 

Ponto de encontro no galpom do Lajareu, pouco pontuais como sempre ;-) mas com humor e vontade de desfrutar do dia. Convidadas e convidados também ilusionadas por embarcar. 

E assi fomos partilhando a travessia...  de parola, umhas froitas de aperitivo (que estão as hortas no momento), e o espetáculo dos conles da punta Aguiuncho, as Grades, as Cabras, as Perilhas, e tantos outros. Ao longe o Falante de Rua, e coa maré no devalo as Minhoteiras e as Lobeiras bem à vista.

Palmeira tranquila e acolhedora como sempre, as dorninhas no porto, o ilhote da Tixosa co seu enigmático vermelho, o Castelo defendendo a entrada e ao longe enxergando-se a Corna, a Arousa, e mesmo o Guidoiro Areoso e o Pedregoso semelhavam estar a fazer acenos para umha visita agora que marchou o persoal veraneante.

Lembrou Sara de Ribeira o dito de sua avoa, "andar entre Ghuidoiros e Rua" quando alghem não se aclarava muito...

No galpom convívio e faladoiro diverso, divertido e entre amigos e amigas que é o que importa, e... atentíssimos às novas que chegassem do resultado da nossa Xaimiña que andava a representar o clube na final da Copa Mörling no Grove. Sexto posto de 42 !!! Parabéns Jaime e Juan !!! 

Palmeira Forever ;-)