FOTOS DA TRAVESSIA E HOMENAGENS

Fotos e algum vídeo da travessia a Palmeira e as homenagens a Domingos Ayaso, Alberto Bermo e Xosé Bermo:

Fotos Elio Rozada

Álbum aberto do clube

Video resumo

TRAVESÍA A PALMEIRA - HOMENAXE A DOMINGOS, ALBERTO E O AMERICANO

O clube Lajareu por Barlovento, xunto a R.e I. Cofradía da Dorna, organizamos para este sábado día 3 de setembro unha xuntanza de embarcacións e travesía na que faremos unha homenaxe ao carpinteiro de ribeira, mestre dorneiro, Domingos Ayaso Oujo, co gallo da sua xubiliación, e pola súa traxectoria e selo na construción destas senlleiras embarcacións.

Así mesmo,  tamén teremos unha lembranza para o noso querido compañeiro e amigo recentemente falecido, Alberto Romero Bermo; e para Xosé Bermo, "o Americano", membro destacado do clube e mestre de mestres na navegación e cultura da dorna, que também nos deixou hai escasos anos.

Gostariamos de contar coa participación de todas as asociacións, clubes, e persoas interesadas, sendo o programa o seguinte:

Ás 11:00 da mañá reuniranse todas as embarcacións na zona do náutico de Ribeira, a carón do galpón do Lajareu para pormos proa a Palmeira e desembarcar no histórico porto para tomar um refresco.

Ás 14.30 horas, de volta no galpón do Lajareu, rendiranse as homenaxes programadas, e faremos un xantar para pasar unha tarde de convivio mariñeiro.

TRANSLATIO - RETO NA RIA DE AROUSA

Um novo reto do nosso companheiro Carlos Barcala. O dia 6 de agosto Carlos propom-se nadar os 35 km da travessia marítimo-fluvial desde a entrada da ria de Arousa até Padrón, continuando à carreira os 25 km que restam até Compostela. O Lajareu de Ribeira acompanhará o nosso marinheiro-atleta neste seu reto solidário.

Tendes todos os dados disponíveis em www.translat.io . Carlos é ademais o responsável da axendadeportiva.com , o guia web mais completo das atividades deportivas populares da Galiza, incluídas a vela tradicional!

ÁNCORA, VOLANDEIRA E VIKINGA NO PODIUM DA REGATA DO CARME DE RIBEIRA

Foi umha regata intensa e vistosa. Deu-se a saída no náutico de Ribeira para remontarmos um refachento Nordés F4 até a boia de desmarque nas Minhoteiras. As catorze dornas participantes percorrem a praia de Coroso num espetáculo de viradas e bolina para deleite do persoal.

Desde aí, duas milhas de empopada para deixar as Airoas por babor, e de bolina de novo loitando até a primeira batea de Palmeira. No canal, o vento era frouxo F2 e ganharom dianteira aquelas dornas que antes viraram na procura do vento da costa, que era potente ainda que marulheiro e por vezes co mar na contra.

Desde Palmeira, de novo umha empopada de andar-se com olho, até deixar por babor o Camouco e pôr rumo às Ínsuas a um desquartelar. Coincidimos no estreito passo entre estes ilhotes e "o Paredón" do porto cos "Xojos de mar" da festa da dorna, exibindo-lhe a toda a paroquia festeira, e a menos de 50 m de distância, o que é realmente umha dorna, e como navega e se fai umha virada...

E para rematar, de novo a remontar o Nordés que não amainava, seguindo o areal de Coroso desde a bóia de saída no náutico até a linha de meta nas Minhoteiras.

Proclama-se vencedora no primeiro posto, a Áncora de Adelino e Agustín, no segundo a Volandeira de José Gago e Sergio Triñanes, e no terceiro a Vikinga de Fernando Redondo e Nacho Jorganes; que recebem os correspondentes troféus. E para todos os participantes e o juiz, o caneco oficial do Clube com um forte aplauso e o reconhecimento do público. Velaí a classificação:

1. ÁNCORA
2. VOLANDEIRA
3. VIKINGA
4. LUSIÑA
5. RABUDA II
6. TEIS
7. PAPOULA
8. CACHI
9. ZOA
10. XAIMIÑA
11. PRAIA DAS CAROLINAS
12. A FIUZA
13. INTRÉPIDA (DNF)
14. PRAIA BANDAURRÍO (DNF)

Caneco oficial do Lajareu

E como sempre o álbum da regata coas fotos feitas por José Maria e a entrega de troféus. Está aberto a quem tenha outras para engadir, que as meta ou nolas passe, que as penduramos nós. Também estão os vídeos da bota abaixo "à mão" da Insuabela aproveitando a força da equipa (gracinhas às reporteiras polo vídeo). 

Álbum de fotos Regata do Carme 2016

REGATA DO CARME. RIBEIRA

Olá a todas as tripulações "dorneiras" das rias. Um ano mais temos convocada para manhã, sábado 23 de xulho, às 16:30, a regata do Carme de Ribeira organizada polo clube Lajareu por Barlovento.

Concentraram-se as dornas que queiran participar na abra de Coroso, como decote, dando-se a primeira pitada às 16:30. Ao final, convívio, entrega de troféus e petiscos no galpão do clube.